喺歷史上如果要數最為精彩嘅「後宮」，可能唔少史友都會第一時間諗起皇帝嘅後宮，但其實清朝嘅大貪官、身家八億幾兩白銀嘅和珅唔單止貪財而且仲好色。佢嘅「後宮」雖然就只有1妻8妾，但其實大部分都係美若天仙。
喺歷史上，和珅嘅正室馮氏系出名門，同和珅好後生嘅時候就已經成親；至於二房嘅長二姑就係和府「財務總監」，亦都因為年輕貌美而深得和珅寵愛。然而，和珅嘅「後宮」唔止咁簡單！
和珅有好多位小妾，其中一位係由貪官王亶望處搶嚟嘅江南才女吳卿憐，早年喺蘇州做歌女嘅佢唔單止識得作詞，仲精通算術，所以佢同二夫人共同處理和珅家中嘅財務，和珅亦都會為咗討好佢而命人將荔枝從廣東運到北京。至於黑玫瑰原本就係揚州鹽商汪如龍選送進貢畀乾隆後宮佳麗，但結果佢黑緞子般嘅皮膚就畀和珅睇中，通過後宮定期釋放宮女之際，以錢財買通關係將黑玫瑰轉移到「淑春園」據為已有，而同樣手法得到嘅小妾亦都有秦淮歌妓小鶯以及紫嫣，可以話和珅真係色膽包天，連皇帝嘅女人都唔放過。
至於小妾揚州美女豆蔻就係江南鹽商汪如龍獻畀和珅嘅「禮物」，亦都因為才貌雙絕深受和珅喜愛；納蘭就係其父親蘇凌為巴結和珅而送出嘅，二人一直就以乾爹乾女兒相稱，和珅亦對納蘭愛不釋手，但最終亦冇娶過門。
除咗傳統嘅中式美人，和珅嘅「後宮」仲有一位名為瑪麗嘅西洋美女，金髮碧眼同樣令到和珅相當寵愛，佢連同吳卿蓮、荳蔻以及黑玫瑰都係同住家廟後院，可見佢哋四人嘅地位。
原圖嚟自網絡